जनजागृती शिक्षण प्रसारक मंडळ, परभणी चे संस्थापक अध्यक्ष श्री. नागनाथ गंगाय्या आरळकर यांचा जन्म ०५ जानेवारी १९४४ रोजी परभणी जिल्ह्यातील एरंडेश्वर या लहानशा गावात झाला. लहानपणीच आई-वडिलांचे छत्र हरपल्यामुळे अत्यंत प्रतिकूल परिस्थितीत त्यांनी बालपण घालवले. घरात दारिद्र्य असूनही त्यांनी भिक्षा मागून उदरनिर्वाह करत शालेय शिक्षण पूर्ण केले. त्यांच्या बुद्धिमत्तेमुळे शिक्षक व गावकऱ्यांनी त्यांना शिक्षणासाठी मदत केली. पुढे त्यांनी कष्ट करून बी.ए., बी.एड., एम.एड. पदव्या संपादन केल्या आणि जिल्हा परिषदेत माध्यमिक शिक्षक म्हणून कार्य केले. नोकरी करत असतानाच अनेक गरजू विद्यार्थ्यांना त्यांनी मदतीचा हात दिला.

शिक्षक संघटनेत सक्रिय राहून त्यांनी शिक्षकांच्या समस्या शासनापर्यंत पोहोचवल्या. शिक्षकांना घरांची सोय व्हावी म्हणून विवेक नगर गृहनिर्माण सहकारी संस्था स्थापन करून अनेकांचे घराचे स्वप्न पूर्ण केले. त्यानंतर सारंगस्वामी शिक्षण प्रसारक मंडळ स्थापन करण्यात त्यांनी मोलाची भूमिका बजावली, जिथे आज अनेक शाळांमधून हजारो विद्यार्थी शिक्षण घेत आहेत.

दिव्यांग विद्यार्थ्यांच्या अडचणी लक्षात घेऊन त्यांनी श्री. सिद्धेश्वर शिक्षक प्रसारक मंडळ, एरंडेश्वरची स्थापना करून मुकबधिर मुलांसाठी शाळा व वृद्धांसाठी वृद्धाश्रम सुरू केला. पुढे २० जानेवारी १९९१ रोजी त्यांनी जनजागृती शिक्षण प्रसारक मंडळ, परभणीची स्थापना करून वसमत येथे मुकबधिर, मतीमंद व अस्थिव्यंग विद्यार्थ्यांसाठी निवासी शाळा सुरू केल्या. समाजकार्याला अधिक वेळ देता यावा म्हणून त्यांनी स्वेच्छानिवृत्ती स्वीकारली.